Hæ, nú hef ég ákveðið að hætta að blogga.

Ég kem þó til með að setja inn færslur í kring um frí, þannig að þið getið fylgst með hvenær ég verð á Íslandi.

Vinir og vandamenn, þið fáið fréttir af mér með tölvupósti.

Ég vildi þó láta ykkur vita að ég er komin með fína íbúð beint á móti skólanum, ferðin út gekk vel og ég er búin að koma mér vel fyrir.

Skólinn byrjaði þann 9. okt. og mér líst bara vel á stundatöfluna og hlakka til að byrja á fullu.

Ástarkveðja, Ella

Nú styttist í flugið til Íslands... legg af stað kl. 3.30 í nótt ( 1.30 að íslenskum tíma)... hlakka ekkert smá til. Ég verð víst að fljúga í gegnum London og verð lent kl. 14.00 að íslenskum tíma á Keflavíkurflugvelli. 

Ég verð í Reykjavík fram á mánudag en þá förum við Frosti til Siglufjarðar og verðum þar í viku. Nú er víst orðið kalt fyrir norðan þannig að ég verð að taka með mér vetrarföt!!! Hér er veðráttan þannig að ég er alltaf í sandölum, pilsi og hlýrabol.

Var að komast að því að sjálfur Armani býr í penthouse íbúð í næsta húsi við Sólrúnu ... við erum þó ekkert að kíkja í kaffi til hans... eigum það bara eftir.

Sjáumst á klakanum

Nú er blíða hér í Mílanó 25. stiga hiti og sól sem er frábært eftir rigningarsumarið mikla á Íslandi, rigningin fylgdi mér hvert sem ég fór þessa tvo mánuði sem ég var á landinu.

Ég er búin að vera að leita mér að íbúð frá því að ég kom út þann 10. september. Sólrún vinkona var svo góð að bjóða mér gistingu og bý ég nú hjá henni og þremur öðrum stelpum.

Þann 9. okt fæ ég afhenda litla íbúð sem er mjög vel staðsett ... á móti skólanum! Hún er að vísu mjög lítil, eitt herbergi, eldhús, baðherbergi og gangur ... samt mjög sæt.

Gabríel er á Íslandi hjá Ömmu & afa á Sigló. Hann verður á Sigló fram að áramótum og kemur þá væntanlega aftur út með mér. Ég sakna hans rosalega mikið og lífið er hálfskrítið hérna án hans

Ég kem á klakann þann 30. sept. og fer aftur út þann 9. okt. Ég verð bara að hitta Gabríel & Frosta, mömmu & pabba og alla hina áður en skólinn byrjar þann 11. okt.

Hlakka til að sjá ykkur, ástarkveðja, Ella

Jæja, nú er ég loksins búin í síðasta prófinu, ég kláraði það í gær og var bara alveg búin eftir það. Kom heim kl. 15. 00 eftir 5. tíma próf og fór beint í bólið þar sem ég var ekki búin að sofa nema í 4. tíma síðustu þrjá sólarhringa. Ég átti að vera mætt á hverfisbarinn kl. 21.00 um kvöldið en þegar Sólrún hringdi þá bara gat ég ekki rifið mig upp og hélt því bara áfram að sofa, þ.a.l. vaknaði því úthvíld í morgun kl. 5 og byrjaði að taka til og pakka niður öllu því sem eftir var í íbúðinni.

Í kvöld ætla ég að flytja draslið mitt í íbúðina hennar Sólrúnar og svo ætlum við eitthvað fínt út að borða. Flugið mitt er kl. 6. 35 frá Bergamo sem er í 40. mín. fjarlægð frá Mílan, þanni að ég verð að leggja af stað eitthvað um þrjú í nótt. Ég flýg svo frá Stansted rúmlega tólf og lendi í Reykjavík um 14. 35.

Það verður ekki smá gott að komast heim í smá kulda, ég er alveg búin að fá nóg af því að vakna upp í svitabaði allar nætur.

Mér gekk bara vel í lokaprófinu þrátt fyrir að hafa áttað mig rétt áður en ég átti að kynna mitt verkefni að ég var ekki með teikningarnar mínar, aðeins um 20. talsins!! Ég fækk því nett taugaáfall og hljóp heim til að ná í þær, en þær voru ekki þar. Þá "fattaði" ég að ég hafði komið við á prentstofunni fyrr um morguninn og mundi hvar ég hafði lagt þær frá mér. Ég hljóp því þangað og náði í þær og notaði tækifærið til að prent út smá kynningarefni sem ég var með tilbúið á minnislykli.

Þegar ég kom inn í stofuna þá var nemandinn á undan mér í röðinni að klára sína kynningu og röðin var komin að mér. Sem betur fer áttaði kennarinn sig ekki á því að ég var í burtu í 20-30 mín, þannig að allt gekk upp. Ég gat að vísu ekki undirbúið mig eins og ég vildi en ég hafði 15. mín. til að kynna mína hönnun á íbúð sem ég er búin að vera að hanna frá A-Ö í allan vetur. Maður verður að skipuleggja sig rosalega vel til að geta komið öllu frá sér á svona stuttum tíma.

Það voru þrír prófdómarar á staðnum, einn arkitekt, einn innanhúsarkitekt og svo iðnhönnuður sem var kosinn hæfileikaríkasti iðnhönnuðurinn í  heiminum fyrir nokkrum árum.

Lokaeinkunin mín fyrir þetta verkefni var 30/30 +++ , þannig að ég dúxaði yfir báða bekkina. Varð bara að monta mig, ha, ha,ha. Ég hefði ekki sætt mig við minna en 30/30 þar sem ég var búin að leggja svo geðveikt á mig, enda kem ég heim hvítari en þegar ég fór út fyrir ári síðan.(aðalatriðið)

Nú er ég komin í sumarfí, blogga næst í sept.

Ég kem til með að blogga "live" á kaffihúsum og ölstofum borgarinnar fram í sept.

Hlakka til að Sjá ykkur elskurnar mínar,

Over and out,

Ella

Nú er klukkan að verða sex um morguninn og ég sem hélt að Saki væri sofandi en annað kom nú í ljós.Þar sem ég var að drepast úr hita ákvað ég að læðast í ískápinn og ná mér í ískalt vatn, en viti menn hver önnur en Saki var hálf út úr ísskápnum og minnstu mátti muna að hún fengi vægt hjartaáfall því henni brá ekkert smá þegar ég kom inn í eldhúsið.

Það tekur því bara ekki að fara að sofa þar sem ég er með milljón hugmyndir sem ég þarf að koma frá mér. Því er best að klára bara verkið á meðan maður er andvaka vegna HITA. Grínlaust þá sef ég nánast með viftuna í fanginu og samt sem áður er ég að deyja úr hita. Stelpurnar sem eru með mér í bekk eru líka að koma klukkan tíu og við ætlum að vinna “Axonometric projection” af teikningunum okkar saman. Það versta er að við þurfum að vinna þetta í þrívídd í AutoCadinu og við höfum bara aldrei lært það. Það er því miður ekki kennt fyrr en á næsta ári! Við finnum eitthvað út úr þessu.

Ég fékk nett sjokk í gær þegar ég hringdi í Glitni og ætlaði að millifæra peninga, en konan sagði mér að ég ætti bara enga reikninga hjá þeim. NB. það er mjög stutt síðan ég ætlaði að hringja í Íslandsbanka og hann var þá ekki lengur til. Það virðist vera að bankinn minn sé í einhverskonar FELULEIK. Mér finnst alveg fáránlegt að ég þurfi að vera að leita að reikningum mínum út um allt. Nú er ég semsagt í viðskiptum hjá Sparisjóði Siglufjarðar, var reyndar ekkert spurð um hvort ég vildi vera í viðskiptum hjá þeim. Ég komst að þessu eftir að hafa:

A. farið inn á heimabankann minn sem tilkynnti mér að ég Elín þorsteinsdóttir, væri nú bara alls ekki til og engin með mína kennitölu væri skráður hjá Reiknistofu-bankanna.

B. Hringt í Glitni sem sagði mér að ég væri bara alls ekki í viðskiptum hjá þeim.

C. Þeir sögðu mér líka að bankinn minn hefði verið SELDUR og þjónustufulltúrinn (eflaust í afleysingum) vissi bara ekkert hvað mínir reikningar væru niðurkomnir!!!

D. Hringt í stresskasti til M&P sem sögðu mér hvað gerst hefði, jú,jú Sparisjóðurinn bara búinn að kaupa útibú Glitnis á Siglufirði, og mér var ekki einu sinni tilkynnt um það.

HVAÐ ER EIGINLEGA AÐ GERAST ÞARNA Á KLAKANUM???? ER BARA ALLT AÐ VERÐA VITLAUST Í ÞESSUM BANKAMÁLUM???

Sumir eru víst ríkari en aðrir, Sue stelpa sem er einmitt að koma klukkan tíu, er víst ein af þessu ríku. Ég hef nú aldrei tekið eftir því að hún sé eitthvað öðruvísi en við hin, hún gengur ekki í hönnunarfatnaði og er bara mjög “down to earth”. En ég komst að því í dag að pabbi hennar er víst einn af ríkustu mönnum í Kóreu. Ég var eitthvað að fárast yfir því að hún fjarfesti í einu stykki loftræstingu (sem er mjög dýr) á meðan við vorum að kaupa viftur á 1400 Kr, sem að auki gera ekkert gagn. Stelpurnar sögðu mér þá frá ríkidæmi hennar, en það eru því miður ekki allir eins og Sue !

Um daginn kom bróðir einnar vinkonu minnar í heimsókn til hennar. Hún er frá Mexíkó og það eina sem þessi strákur talaði um var hvað íbúðin systur sinnar væri mikil rottuhola og ógeðsleg og væri hreinlega ekki mönnum bjóðandi, en þessi rottuhola sem hann er að tala um er nýuppgerð og það er mjög dýrt að leigja hana. Yfirleitt þurfa tveir að leigja svona íbúð saman þar sem leigan er mjög há. Þessi stelpa býr ein í þessari fínu íbúð og hann var að fárast yfir því hvað hún væri lítil. Hann sagði að það væri fyrir neðan allar hellur að hann þyrfti að búa í svona rottuholu og hann væri farinn á Hótel Plaza. Svo var hann eitthvað að monta sig á öllum þjónunum sem þau hafa yfir að ráða. En þau eru með kokka, barnapíur, bílstjóra og svo framvegis. Saki sagði nú bara við hann að fyrst hann væri svona hrikalega ríkur þá væri nú ráð að hann fengi sér stílista og einhverja persónu sem gæti kennt honum mannasiði. Hann var alveg hrikalega hallærislegur með skyrtuna opna niður að nafla og var sífellt að tala illa um systur sína, ekki merkilegur pappír þar á ferð.

Seinna í dag eru útskriftarnemarnir að sýna afrakstur vinnu sinna í vetur, ég fer að sjálfsögðu og lít á verkefni þeirra. Ég fór einnig í júlí í fyrra niður í IED og leit þá á verkefnin og var mjög heilluð, þessir krakkar eru að gera ótrúlega hluti. Annars sit ég yfir tölvunni alla daga og nú fer ég að sjá fyrir endann á þessu öllu. Stefni á að prenta út allar teikningar á föstudaginn og vinna svo í Módelinu og kynningarefninu um helgina og fram á miðvikudag. Það er alveg geðveikislega dýrt að prenta út stórar teikningar í lit í A0 stærð og einnig er efnið í módelið mjög dýrt. Efniskostnaður fyrir þetta ár er alveg rosalegur, það er ekki eitt einu sinni eitt A4 blað innifalið í skólagjöldunum og við erum að tala um skólagjöld uppá 7500 evrur fyrir árið. Þetta er náttúrulega bara klikkun. Jæja, nú fer að líða að Expressó bolla, tvöföldum að sjálfsögðu enda verður maður að halda sér vakandi fram á kvöld. Ciao, Ella

Í gær var “menningarnótt” hér í Mílan, ég byrjaði daginn á því að fara á barinn og horfa á Svía og Þjóðverja keppa. Ég og Saki komum þegar 15. mín voru liðnar af leiknum og þá var staðan 2:0 fyrir Þjóðverjum og allir Svíarnir voru miður sín. Það var aðeins einn þýskur strákur á barnum og hann var auðvitað frekar glaður.

Fyndið þegar maður þarf að tala mörg tungumál inn á sama barnum. Ég tala ensku við Saki og hina Svíana, þýsku við þjóðverjann, ítölsku við barþjónana þar sem þeir skilja enga ensku, og loks Íslensku við Sólrúnu. Svo er ég farin að skilja sænsku ágætlega þannig að maður græðir heilmikið á því að vera í alþjóðlegum skóla.

 

Eftir leikinn fórum við heim og allt í einu varð bara allt vitlaust, hundarnir trylltust og fuglarnir klikkuðust og svona mínútu seinna kom þvílíkur stormur allir hlerar og gluggar í blokkinni skelltust til og frá og allt bergmálaði í kring, svo kom grenjandi rigning og þrumur. Við Saki notuðum náttúrulega tækifærið og hlupum út í rigninguna og tókum góðan göngutúr. Í gær var nefnilega 35. stiga hiti kl. 19.00, það var engin sól og í svona miklum raka er í raun miklu heitara um eða um 40 gráður. Við vorum því ekki smá fegnar að fá rigningu til að kæla okkur niður. Við enduðum svo á skólabarnum og horfðum á leik Argentínu og Mexíkó.

 

Um kvöldið fórum við svo í svakalega fínt partý hjá skólanum okkar, IED . Partýið var haldið í stórum garði þar sem veðreiðar eru haldnar. Fína og fræga fólkið er víst alltaf að djamma þarna og það kostar morðfjár að leigja garðinn. IED getur nú líklegast borgað fyrir svona partý þar sem við borgum svo há skólagjöld og í minni deild eru um 2000 manns  og í Mílan eru um 8000 krakkar í IED.

Þegar við komum inn þá hittum við konuna sem er yfir IED og hún bað okkur nú endilega um að muna eftir að taka með okkur “goody bag”. En allir fengu poka með Tískutímaritum, bæklingum um skólann og e-h snyrtivörum.

Útskriftarnemarnir í fatahönnun voru með svakaflotta tískusýningu og fræga og fínafólkið sat meðfram sýningarpallinum en við stóðum alveg upp við hann mjög framalega. Þetta var mjög flott tískusýning og krakkarnir eru að gera mjög góða hluti.

 

Í kvöld var ég að flytja allt dótið mitt til þar sem ég þarf að skila íbúðinni þann 7. júlí. Sólrún og Saki hjálpuðu mér að flytja dótið til Óla og Esterar og svo fórum við líka með heilmikið heim til Sólrúnar. Sólrún var á bíl þannig að við vorum bara fljótar að þessu.

 

Framundan er mikill lærdómur og þar sem hitinn er að drepa okkur þá erum við búnar að snú sólarhringnum við. Vöknum kl. Þrjú á daginn og förum að sofa sjö á morgnana.

Við erum reyndar búnar að kaupa okkur viftur er þær gera svo lítið gagn þegar hitinn er svona mikill. Annars er skólabarinn loftkældur og við förum því oft þangað og fáum okkur einn kaldann.

 

Ég get ekki beðið eftir að komast heim, það er alveg öruggt að ég verð ekki hérna næsta sumar, ef ég á eftir próf þá ætla ég bara að fresta því fram í sept.

Ég talaði við Gabríel í dag og hann er að blómstra á Patró, amma hans eldar svo góðan mat að hann er búinn að þyngjast um þrjú kíló sem er alveg frábært. Hann fer líka í sund á hverjum degi og er bara mjög ánægður. Ég sakna hans rosalega mikið og hlakka til að hitta hann þegar ég kem til Íslands.

 

Ciao, Ella

Í kvöld er England að Spila við Svíþjóð og ég fer auðvitað á barinn til að horfa á leikinn. Það er svo æðislegt að horfa á leiki hérna úti, maður fer bara á barinn og hittir þar alla skólafélagana. Þegar Ítalía er að spila þá er náttúrulega klikkað stuð og þvílík tilfinningaflæði hjá Itölunum. Þeir eru þó talsvert ólíkir Englendingum m.t.t. þess að þeir rífast um fótbolta en slást ekki.

Þar sem ég bý með Sænskri stelpu þá er skyldumæting á þennan leik. Við ætlum að fara með tveimur öðrum Svium þannig að það verður stuð. Annar Svíinn er model hjá Armani en maður kippir sér ekkert upp við það þar sem það er allt krökkt af fyrirsætum hérna. Ég var t.d. að tala við einhvern strák á djamminu um dagin, hann var voða sætur en samt ekkert guðdómlegur. Í gær var ég svo að lesa Wallpaper og sá hann þar í einhverri heilsíðu-auglýsingu fyrir Dolce & Gabbana. Ég verð nú að segja að þessar myndir sem þeir taka eru lagaðar talsvert til.

Jæja nú er best að fara að halda áfram að teikna í AutoCadinu, það fer þvílíkur tími í að sitja fyrir framan tölvuna. Ekkert sólbað í dag frekar en fyrri daginn!

Ciao,

Ella

Nú er orðið verulega heitt hérna í Mílan, í staðin fyrir að fá mér að borða kvöldmat þá fór ég beint í ísbúðina. Það er ekki hægt að klæðast neinu nema hlýrabolum og stuttum pilsum.

Ég kem til landsins þann 7. júlí kl. 14.45. Það verður gaman að komast í smá kulda og rigningu, ha.ha.

Annars er mjög mikið að gera í skólanum og ég hef ekki geta farið í sólbað nema einn dag í sumar! Um næstu helgi ætlum við að grilla og liggja í sólbaði.

Hlakka til að hitta ykkur öll,

Ella

Ef þið hafið ekki horft á framhaldsþættina Prison Break, þá verðið þið að byrja á því ekki seinna en strax. Aðalleikarinn er guðdómlega fallegur !! Loksins er eitthvað gert fyrir okkur konurnar. Vinkona mín lánaði mér fyrstu 13. þættina og ég horfði á þá í einum rykk. Vinur minn lánaði mér svo síðustu 9 þættina og það var eins með þá ég gat bara ekki hætt að horfa og vakti í alla nótt. Ég er  því ósofin og byrjaði daginn á því að fara út að hlaupa rétt fyrir sjö í morgun. Nú er orðið svo heitt hér í Mílan að ef maður ætlar að gera eitthvað að viti þá er best að vakna kl. 6.00 á morgnana. Um hádegi og fram eftir degi er steikjandi hiti.

Í dag ætlum við Íslendingarnir að halda uppa á daginn með því að fara í “pick nick” í voðalega fallegan garð. Ítalska landsliðið er að keppa í fótbolta í  kvöld þannig að við endum örugglega á hverfisbarnum og horfum á leikinn.

Moskító  flugurnar eru orðnar ansi aðgangsharðar og greyið hún Saki er öll bitin. Ég er með eitt bit rétt við augað og er alveg að drepast. Bitin eftir þessar flugur hérna í Mílan eru svakaleg, maður bólgnar svo hryllilega eftir þau.

Nú á ég bara eitt próf eftir 5. júlí og það er ansi stórt. Í þessu prófi þarf ég að kynna fyrir tilvonandi viðskiptavini sem er jafnframt prófdómari,  íbúð sem ég hannaði frá A-Ö. Auk teikninga af íbúðinni sem er á þremur hæðum þá þarf ég að gera módel í skalanum 1:20 með húsgögnum og öllum smáatriðum. Þetta er mjög skemmtilegt verkefni en ansi tímafrekt og kennarinn minn sem er virtur arkitekt hér í Mílan er mjög kröfuharður.

Ég kom annars rosalega miklu í verk í nótt, horfði á heila seríu af Prison Break, gerði armbeygjur og magaæfingar, snyrti á mér fætur og hendur, skipulagði sumarið, svaraði tölvupósti og margt fl. Ef maður getur ekki sofnað þá verður maður bara að nýta tímann til hins ýtrasta, ekki nenni ég að eyða allri nóttinni í að reyna að sofna.

Jæja darlings, nú verð ég að byrja að læra þannig að ég geti með góðri samvisku farið í pick nick kl 14.00 í dag. Auðvitað mæti ég með Íslenska fánann á svæðið, ég þarf ekki að hafa áhyggjur að vera lamin þar sem Ítalir voru ekki með í Eurovison þetta árið, ha.ha.ha.

 

Eins og Þuríður segir alltaf “Til lífs og Gleði, aðallega til Gleði”

 

Love Ella

 

 

 

 

Hæ elskurnar mínar.

Ég var í fjóra daga í Köben og það var alveg frábært. Ég og Gabríel vorum komin um tvöleitið á hótelið en Frosti og Freydís(systurdóttir hans) komu ekki fyrr en um kvöldið.

Ég notaði fyrsta klukkutímann í að mynda hótelherbergið, þvílík hönnun. Við gistum á Radisson SAS Royal hotel, en það er hótel sem Arne Jacobsen hannaði. Úr herberginu okkar var útsýni til tveggja átta frá 13. hæð og til að komast í Tívolíð þá þurftum við bara að labba yfir götuna. Það var æðislegt veður í Köben , samt frekar kalt, enda erum við Gabríel vön því að vera í 25-30. stiga hita.

 

 

Tvær vinkonur mínar frá Íslandi Kristbjört og Inga Lára  komu í vikuheimsókn, Það var alveg rosalega gaman að fá þær í heimsókn. Þær voru mjög duglegar að versla og liggja í sólbaði eins og sönnum Íslendingum sæmir. Við nutum lífsins og áttum yndislegan tíma saman. Ég þurfti að fara í stórt próf og gat því ekki sinnt þeim eins og ég hefði viljað. En það kom ekki að sök því þær voru svo uppteknar við að liggja í sólbaði. Enda fóru tvær gullfallegar og sólbrúnar skutlur heim til Íslands. Strákarnir eru enn að spyrja um þessar fegurðardrottningar!!!

 

 

Ég hef alltaf vitað að Ítalir eru mjög áhugasamir um fótbolta. Í gær þá var ég að labba í venjulegu Íbúahverfi með vinkonum mínum þegar þvílík öskur heyrðust út um allt. Já Ítalía hafði skorað mark á HM. Ég er ekki að grínast en það var eins og við værum staddar í nágrenni við bar þar sem allir fótboltaáhugamenn á Ítalíu væru saman komnir. Svo var ekki heldur voru allir heima hjá sér að horfa á leikinn og allar götur tómar og fagnaðarlætin bergmáluðu í hverfinu. Þetta var ótrúleg upplifun.

 

 

Við skruppum svo á kaffihúsið á móti skólanum mínum, strákarnir í skólanum voru búnir að loka götunni og voru að spila fótbolta, þvílík stemming. Að lokum þurfti að kalla út lögregluna því allt endaði í slagsmálum.  Alveg dæmigert !!!

 

 

Í kvöld fór ég með stelpunum úr bekknum út að borða sushi og það var geðveikt gott og mjög ódýrt.  Við vorum 6. saman,  ein frá Bandaríkjunum, tvær frá Ítalíu, ein frá Kóreu og önnur frá Svíþjóð. Eftir matinn þá ákváðu stelpurnar að fara með mig á besta ísstaðinn í bænum. Sara frá Ítalíu var á bíl og þegar við vorum búnar að keyra í um 20. mínútur þá áttuðum við okkur á að við vorum búnar að keyra í hring, vorum sem sagt aftur fyrir utan sushi staðinn. Það er mjög erfitt að rata um Mílan og það tók okkur því um 40. mínútur að komast á réttan stað. Ég fékk mér auðvitað ís og þvílík sæla, þetta var besti ís sem ég hef á ævinni smakkað!

 

 

Þessi vika fer i að læra en í næstu viku ætlum við vinkonurnar að leigja bíl og keyra um Ítalíu. Fyrir 4. daga þá borgum við 4000 kr. Maður verður að skoða landið fyrst maður býr hérna á annað borð.

 

 

Love,

Ella

 

 

 

 

Í dag flutti Saki inn til mín, hún er frá Svíþjóð og er með mér í bekk. Hún kemur þó ekki til með að vera í skólanum á næsta ári þar sem hún er að flytja til London. Kærastinn hennar er innanhúsarkitekt og er í mjög góðri stöðu þar og hún ætlar í Kingston University til að læra innanhúsarkitektúr.

 

 

Á morgun, þriðjudag fer ég til Danmerkur og mig hlakkar ekkert smá til. Að vísu er rigningarspá allan tíman sem ég verð þarna, en það er aldrei að marka þessar spár.

Svo er það bara ljúfa lífið þegar ég kem aftur til Mílan, þarf bara að hugsa um mig sjálfa og vinna í verkefnum fyrir skólann.

 

 

Ciao Ella

 

 

Sælar elskurnar, þessi helgi er búin að vera alveg frábær. Ég fór í matarboð til Sólrúnar, Ísabellu og Daníels í gærkveldi. Þau elduðu æðislegan mat og buðu uppá rauðvín með.

Við sátum við kertaljós og ljósaseríur með alla glugga opna uppá gátt og nutum veðursins.

 

Hér í Mílan er frábært veður sól og hiti. Ég labbaði með vinkonum mínum í bæinn í dag og við vorum hreinlega að deyja úr hita, samt var ég  mjög léttklædd, í stuttu pils, hlýrabol og sandölum. Við Gabríel fengum okkur göngutúr í góða veðrinu áðan og þrátt fyrir að það sé komið kvöld þá er mjög heitt og notalegt úti. Ég hreinlega elska þessa veðráttu.

 

Nú fer að styttast í að Gabríel fari heim til Íslands. Við fljúgum til Danmerkur á þriðjudaginn og það á ekki eftir að vera smá einmannalegt þegar hann verður farinn þessi elska.

 

Ef þið hafið áhuga þá getið þið farið inná vef mbl.is og leitað í myndasafninu undir leitarorðinu Sólrún, en þá getið þið séð mynd af Gabríel á Eurovision. Hann er að vísu rangfeðraður en þið komið til með að þekkja prakkarann.

 

Ciao,

Ella

Við lentum í Aþenu á fimmtudegi og um leið og fólk vissi frá hvaða landi við vorum, þá byrjaði það að hneykslast á Silvíu Nótt. Þar sem við vorum ekkert búin að fylgjast með fjölmiðlum þá vorum við viss um að við myndum vinna þessa keppni en vorum nú farin að efast.

 

 

Fyrsta mál á dagskrá þegar við lentum var að reyna að redda okkur miða á keppnina. Við vorum 5. enn áttum bara 4. miða. Ekkert gekk að finna miða þannig að ég var orðin viss um að ég þyrfti að sitja ein heima á hóteli og horfa á keppnina í sjónvarpinu.

Við lögðum á okkur að fara alla leið að Ólympíu höllinni til að reyna að kaupa miða, ferðin tók c.a 40. mín með neðanjarðarlest. Engir miðar voru í boði þar.

 

 

Daginn sem keppnin var þá lögðum við á stað snemma með lest, við vorum að flýta okkur frekar mikið og gleymdum Íslenska fánanum !!! Þvílík mistök.

 

 

Við komum að Ólympíu höllinni með Metro og þvílík sjón, hún er rosalega stór og umhverfið í kringum hana er fallega hannað.

Ræddar vorum ýmsar leiðir til að smygla Gabríel inn en þegar við komum að hliðinu þá leist okkur ekki á blikuna þar sem öryggiskerfið var svo strangt, málmleitartæki og læti og auðvitað fullt af öryggisvörðum!

 

 

Þegar strákarnir fóru að skipta staðfestingarskjalinu fyrir miða þá var fullt af fólki að reyna að selja miða og ég gat valið um staðsetningu og verð, þvílík heppni. Nú var bara að prútta og fékk ég miða á góðum stað fyrir miðju frekar framalega.

Ég vildi frekar sitja hjá Gabríel og krökkunum þannig að við ákváðum að ég myndi bara sitja undir honum. Það kom svo í ljós að okkar sæti voru í fremstu röð á svölum frekar nálægt sviðinu þannig að það var ekki vandamál með pláss. Einnig voru tvö sæti við hliðina á okkur sætum laus þannig að ég fékk sæti líka og það fór bara vel um okkur, allt er gott sem endar vel!!! Það var bara eitt sem vantaði Íslenska fánann, við hefðum getað lagt hann yfir handriðið á svölunum, hann hefði ekki verið smá áberandi !!!

 

 

Nú loksins skildi ég af hverju fólk fer á þessa keppni ár eftir ár, þvílíkt ljósadýrð og gleði.

Ég var alveg dolfallin þegar opnunaratriðið byrjaði, það var virkilega flott.

Gabríel var með stjörnur í augum og skemmti sér rosalega vel. Hann var einn af fáum krökkum sem voru þarna á svæðinu.

Áður en keppnin byrjaði þá sendi hann mig til að finna sjálflýsandi hálsmen og á meðan ég var í burtu þá tók blaðamaður myndir af Sólrúnu, Benna, Óla og Gabríel. Hann var frekar ánægður með það. Ef þið sjáið þessa mynd þá endilega látið mig vita þannig að ég geti sýnt honum hana.

 

 

Nú var komið að Íslandi og við vorum í þvílíkum gír og spennt að sjá vinningslagið, um leið og Silvía Nótt og Íslenski hópurinn stigu á svið þá var púað geðveikt ! Við vorum eftir allt bara heppin að vera ekki með Íslenska fánann., því þá hefðum við eflaust verið barin í klessu.

Talandi um dónaskap, Sílvía var ekki ein á sviðinu og þó svo að hún hafi sagt eitthvað miður fallegt þá er hrikalega dónalegt að púa, fólk er búið að leggja hrikalega mikið á sig og það er ekki okkar sök ef þessir dónar hafa engan húmor.. Ég sagði við konuna fyrir aftan mig að hætta að púa af því að ég væri að reyna að hlusta á lagið og þá gaf hún mér bara fingurinn, bíddu var hún ekki að hneykslast á Silvíu fyrir dónaskap.

Við ákváðum þá bara að fagna hrikalega og stóðum bara upp og dönsuðum á meðan að hún flutti lagið og fögnuðum svo vel á eftir.

 

 

Næsta dag fórum við að skoða allt það merkilegasta í Aþenu og hún hefur ekki breyst smá á þeim 10. árum frá því að ég kom þangað síðast með Sigrúnu Ósk. Þá fannst mér borgin ljót en núna var hún þvílíkt falleg og mannlífið mjög skemmtilegt.

Ég kannaðist bara ekkert við mig, það hefur orðið þvílík uppbygging vegna þess að þeir héldu Ólympíuleikana 2004.

Við rákumst á dansarana, Romario og Gísla og Gabríel fékk að sjálfsögðu eiginhandaráritun hjá þeim.

 

 

Ciao,

Ella og Gabríel

 

 

 

 

 

 

 

 

 

 

 

 

 

 

 

 

 

 

Takk fyrir allar afmæliskveðjurnar elskurnar mínar!

Ester, það verður partý hjá mér 3. júní !

Ég er farin til Aþenu, sjáumst

Ég vaknaði snemma í morgun eða um hálf átta. Það er alveg yndislegt að vakna á undan öllum öðrum sérstaklega um helgar. Ég byrjaði daginn á líkamsskrúbbi og sturtu síðan fékk ég mér ný kreistan safa úr eplum, appelsínum, gulrótum, engifer, sítrónu og jarðaberjum, þvílík vítamínbomba.

 

 

Gabríel vaknaði þegar ég var að ná mér í handklæði, hann sagði bara “ til hamingju með daginn elsku mamma” lokaði síðan augunum og hélt áfram að sofa.

Hann fór með mér að versla fyrir afmælið í gær, hann var svo spenntur að hann vildi endilega kaupa blöðrur og kerti. Það var eins og við værum að kaupa inn fyrir afmælið hans því allt sem hann kom með var blátt ! Svo fór hann nú alveg með það þegar hann birtist með kerti, hann var voða ánægður að hafa fundið réttu kertin fyrir mig, en það voru kerti sem voru númeruð 38!!

 

 

Ég fór í bæinn í gær með Ievu og Sólrúnu, við fórum í H&M og ég keypti mér sumarföt. Við fórum svo út að borða á kínverskum veitingastað og fengum alveg frábæran mat.

Á eftir fengum við okkur auðvitað ítalskan ís, þvílík sæla.

 

 

Í kvöld verður svo matarboð hjá mér hér er matseðilinn:

 

 

Forréttur 1:

Hráskinka og hunangsmelóna

 

 

Forréttur 2:

Mascopone ostur með eggaldin, basil og tómötum.

 

 

Aðalréttur:

Nautafilet með Sherry sósu ala Hulda & Hörður + meðlæti

 

 

Eftirréttur 1:

Nýbökuð súkkulaðiterta með ís og jarðaberjum.

 

 

Eftirréttur 2:

Rauðvín og ostar.

 

 

Það verða 3. gestir í mat hjá mér í kvöld,  en það eru Sólrún, Óli og Benni.

Við ætlum líka að taka púlsinn á Eurovision  keppninni þar sem við förum til Aþenu á næsta miðvikudag! Óóó já, það eru bara 2. dagar þar til að við förum.

 

 

Ástarkveðja,

Ella